Andoriñas

Na esquina entre o "Provi" e o Benalúa, hai varios niños

Unha cría de andoriña nun niño de todos os veráns, situado

nunha casa preto da zapatería de Ventura

Un niño abandonado, xa en desuso, na "cantina"

Tres crías espabiladas, en Entrecortiñas

Remata a época de cría e as andoriñas comezan a abandonar os niños. Aínda se ve algún pequeno rezagado á espera de que os pais lle traían comida á gorida segura do niño, pero a maioría das crías xa se aventuran a voar de cable en cable. Este verán, as andoriñas foron fieis aos seus niños de costume nas casas do centro urbano da illa. Están a gusto ampliando a familia no medio dos veciños, e que sexa así por moito tempo.

Arroaces

Arroaces no carreiro de Carreirón, o pasado domingo

Nas augas da Arousa non é difícil avistar bandadas de arroaces saltóns. Estes inquedos mamíferos, que se alimentan de peixes, gozan da simpatía das xentes do mar, e iso que moitas veces furan as redes dos mariñeiros na procura de presas fáciles.

Flora dunar

Rabo de coello, na praia das "Señas"

"Bágoas de crocodilo"

Xa que falamos aí atrás do carpobrotus, o protagonismo nesta ocasión correspóndelle a dúas especies propias das dunas e os areais costeiros da illa, o rabo de coello (lavutus ovatus) e as “bágoas de crocodrilo”. Esta última especie é probable que teña outros nomes, agradécese a información sobre a denominación científica. As dúas imaxes foron captadas na praia das Señas.

A ponte de noite

Este fondo de pantalla está dispoñible na web turística O Salnés.

A invasión do Carpobrotus

O carpobrotus na praia de Camaxe

Manto púrpura de carpobrotus en Con Cerrado

Esta planta invasora está presente na costa do Salnés.

Nas illas do Mediterráneo levan anos loitando contra ela

O aspecto do carpobrotus, nun día de chuvia

O carpobrotus é unha planta de rechamantes flores rosadas, orixinaria de Sudáfrica, que medra en chans salinos e areosos. Está considerada unha especie invasora de gran poder colonizador, que cubre totalmente a superficie na que medra, provocando a desaparición de especies autóctonas. Na illa xa hai unha década que está presente nalgunhas praias como a de Gradín, pero agora ameaza con converterse nunha praga. Nas imaxes, fresquiñas da chuvia de hoxe, podedes ver como extende o seu manto de beleza envenenada de Camaxe a Con Cerrado.

Abandono de cans no faro

Cans no faro, o do medio, abandonado

A xente que frecuenta o faro sabe que este é un lugar habitual de abandono de cans, sobre todo, coa chegada do bo tempo. Os cadelos famélicos de mirada triste xúntanse cos cans dunha propiedade veciña, a ver o que lles cae de comer. Nesta zona tense dado, incluso, un caso de roubo dun animal, perfectamente coidado e querido polos seus amos, que apareceu aos poucos anos no mesmo lugar, esquelético e maltratado. Os responsables do abandono de animais son, probablemente, de fóra, pois calquera can criado na illa non tardaría en presentarse de novo na porta da casa.

Patos urbanos

A degradada zona comprendida entre o Regueiro e o Portiño non semella un lugar apropiado para que aniñen paxaros, e con todo, foi o sitio elixido por unha parella de patos en liberdade para deixar a vida de nómades. Asentaron no paseo marítimo situado tras a casa de “chiquita”, e cos coidados e mimos dunha veciña, foron reproducíndose felizmente ata formar unha familia que agora anda polos 20 membros. Cada patiño ten un anel na pata que identifica a súa procedencia.

O Chopo

O Chopo, en distintos momentos,

no seu lugar de sempre

Apareceu un día no Chufre, desahuciado por algún amo sen escrúpulos. Dende entón, e xa hai anos, forma parte da paisaxe do porto. O “Chopo”, tal e como o bautizaron os que o coñecen, dorme acurrunchado contra o colector do lixo, chova ou vente, e come do que lle dan os veciños. Escoitei nunha ocasión unha conversa na que se falaba de facerlle unha caseta. “A este can poslle unha caseta, e seguro que continúa durmindo á intemperie”, contestou un. E se cadra, levaba razón...

Desfeitas nas casetas de Carreirón

Caseta de avistamento de paxaros, en Carreirón

Vista desde a caseta

Este verán, Carreirón luciu novas casetas de madeira, despois de anos de abandono destas instalacións. Esta especie de refuxios, estratexicamente situados para agardar o avistamento de paxaros, levan moito tempo instalados no parque natural, pero sofren continuamente actos de vandalismo. Hai unha semana apareceu case desfeita unha das novas casetas, a situada preto da praia dos Espiños, fronte á zona de marismas chamada popularmente “augas quentes”.

A illa dos cons

O Con de Tres Pes, en perfecto equilibrio

Cons e penas teñen nome propio na illa. A situación das pedras debeu ser noutro tempo un importante referente xeográfico para orientarse e sinalar lugares, de xeito que a nosa microtoponimia recolle moitas mostras destes nomes, aínda que nalgúns casos xa non exista o con que deu lugar á denominación. Estes son algúns dos nomes que fan referencia ás pedras:

Con de Navío
Con de Tres Pés
Con do Forno
Con do Sol
Con do Moucho
Con Retellado
As Laxes
Laxe do Pan
As Penas
Pedracerrada
Pedrouzos

As imaxes do camiño que vai á Praia do Peixe non precisan comentarios

A desfeita -oficial- de Gradín

Os veciños da Illa de Arousa lideran nos últimos anos as estatísticas de reciclaxe en Galicia. A maioría dos fogares teñen interiorizado o hábito de separar o plástico e o vidro do lixo. Ademais, o Concello foi pioneiro no ano 1999 ao introducir a compostaxe –no marco do programa Life da UE– para tratar os residuos orgánicos domésticos e convertelos en abono. Con estes precedentes, non se entende o que está pasando na zona de Gradín.

¿Como é posible que os residuos urbanos do Concello se guinden e se queimen nunha praia?. A liña de costa comprendida entre Gradín e a Praia do Peixe está a sufrir unha desfeita ambiental irreparable, e para canto máis, con impunidade: vertidos das depuradoras próximas, movementos de terra, vertedoiros de lixo incontrolados e “controlados”... e por se fora pouco, está proxectada na zona a construción dun parque industrial, de dubidosa contribución económica ao desenvolvemento da vila. ¿Que mellor investimento para o futuro que a conservación da paisaxe?

Eis onde se "tratan" os residuos urbanos da Illa de Arousa

Gradín amosa un preocupante deterioro nos últimos anos

Pola recuperación do maltratado Portiño

Antiga fábrica conserveira, actualmente convertida nun almacén de materiais de construción. O vello peirao, abandonado, está totalmente derruído

Acceso ao Portiño desde a rúa do Charco. O escaso areal que quedou libre de cemento, ao fondo, está cheo de restos de cerámica.

No medio dos cons, cheos de piche, hai todo tipo de ferrallas

No Portiño aínda queda un pequeno campiño sen edificacións

A magnífica posta de sol que ofrece a zona

Cando as autoridades competentes se decidan a recuperar ambientalmente a liña de costa comprendida entre O Regueiro, O Portiño, Sucabirto e a Abilleira pequena (e por recuperar non se entende facer un paseo marítimo de cemento); e cando os veciños deixen de botar cascallos e maltratar a praia, amosarase ante nós toda a fermosura desta zona de cons, onde cada posta de sol se converte nun impresionante espectáculo da natureza.
O Portiño demostrou, ademais, unha excelente capacidade de recuperación cando, logo de moitos anos de vertidos directos de augas fecais, que cubriron a area de sudre, se instalou o caño de augas depuradas. Cun bo plan de actuación, ata se poderían habilitar zonas de baño urbanas decentes.

¿Os de sempre?

Imaxe retocada sobre a orixinal de R. Estévez

publicada no Faro de Vigo

Esta mulleriña menuda, de loito de pés a cabeza, co seu bolso de “ghanchete", está acusada de provocar varios incendios en Ponteareas, ao parecer, para facerlles mal a uns veciños cos que non se entendía por un problema de terras. Entre os 40 detidos hai varios anciáns coma esta pobre vella de 72 anos, que probablemente non ten o seu sentido…támén hai algún menor, persoas con deficiencias, ex brigadistas… segundo os expertos, “o perfil de sempre”. Miles de hectáreas calcinadas nunha semana e catro persoas mortas ben merecen unha explicación máis complexa que “os de sempre”.

Hipóteses

Incendio en Rianxo, visto desde a Illa

Os xornais galegos ofrecen todo tipo de hipóteses para tentar dar unha explicación ó que está pasando en Galicia, desde intereses económicos (ligados a madereiras, especuladores, ás propias empresas de extinción de lumes….) ata axustes de contas persoais ou vinganzas de ex brigadas resentidos. Tamén os intereses políticos aparecen citados no posible abano de causas, aínda que máis timidamente pola gravidade do asunto e pola dificultade de demostralo; hai quen apunta a unha operación de desgaste do bipartito, unha teoría que tampouco é nova, pois xa nos gobernos populares se sinalaba á oposición como presunta incendiaria. Sexa como for, o goberno español insiste en que hai unha trama organizada detrás dos lumes que están a devastar Galicia.

Muiño do vento

Praia do Peixe

Terrorismo forestal na Arousa!

Borralla en suspensión

A Arousa está vivindo neste día unha auténtica xornada de terror. Pola mañá cedo, detectouse un foco de lume na zona da Lavanqueira, próxima ao parque natural de Carreirón, que foi extinguido rapidamente coa colaboración dos veciños e os servizos contra incendios.
Á unha da tarde, iniciouse outro incendio de magnitudes considerables na zona de Gradín, que se extendeu por detrás do muíño do vento ata Espiñeiro, aproximándose perigosamente ás casas. Colaboraron varios helicópteros e camións de bombeiros, ademais de miles de arousáns de todas as idades. A este paso, a Illa está quedando sen masa forestal...

Estragado un dos curruchos máis bonitos...

O lume chegou ao Con da Grañeira

¿Como se orixinou o incendio?

Unha fumarada espesa rodeaba a Arousa

Durante toda a tarde do luns 7 de agosto, o ceo da illa estivo cuberto de fume dos incendios que había activos por toda a ría. As charamuscas chegaban ás portas das casas e o sol tiña un ton alaranxado apocalíptico, parecía un día de tronada.Pola noite, saltou a alarma: había lume na Area da Secada. ¿Pero chegou a través dunha charamusca ou alguén o provocou?

Arde desde Con do Navío ata Testos

Vista do monte de As Penas

O 7 de agosto produciuse na Arousa un incendio, que se orixinou aproximadamente ás once da noite, e que arrasou os pinares desde o Con de Navío, pasando polas Penas, detrás do Santo, A Bouza e Testos.O foco inicial localizouse nas Penas pero propagouse rapidamente coa axuda do vento e o estado do monte, cheo de toxos e silvas de medio metro de altura, a pesares da intervención dos veciños da Arousa e dun par de camións de bombeiros.

As Penas